Is é an 26ú lá de mhí na Samhna an dáta deiridh a nglacfar le hiarrtais don scoilbhliain 2023/24.
Fáilte an Phríomhoide
Is mór an onóir dom ár gColáiste agus an t-Aonad nua lán-Ghaeilge a bheidh ar an bhfód sa bhliain 2019 a chur in iúil daoibh. Tabharfaidh Gaelcholáiste Mhic Shuibhne deis oideachais ar leith do dhaltaí agus dá dteaghlach i dTuaisceart Chathair Chorcaí.
Déanfaidh na daltaí a gcuid staidéir trí mheán na Gaeilge i gcomhthéacs nua-aimseartha agus bríomhar le réimse leathan ábhar agus teicneolaíocht faisnéise maraon le hoiliúint agus áiseanna iontacha.
Tá Pobalcholáiste Thraolaigh Mhic Shuibhne chun tosaigh i bhforbairt agus feidhmiú cláracha nua a chruthú chun freastal ar na riachtanais áitiúla. I nGaelcholáiste Mhic Shuibhne is gné lárnach é cultur na Gaeilge i saol na scoile; teanga, spórt agus ceol san áireamh.
Tá fáilte roimh bhur dtuairimí agus tuairimí bhur bpáistí. Tá caidreamh láidir againn leis an bpobal áitiúil agus tá Student Voice gníomhach sa scoil féin, mar sin beidh tionchar mór ar fhorbairt an Choláiste agaibhse agus ag bhur bpáistí.
Táimid fíor-bhuíoch as an dtacaíocht atá faighte againn cheana féin. Ba mhaith linn ár mbuíochas a ghabháil ach go háirithe leis an tOllamh Pádraig Ó Machain. Tá teachtaireacht uaidh le léamh níos déanaí sa bhróisiúr seo.
Chomh maith leis sin, gabhaimid buíochas le Príomhoide agus le Cathaoirleach Bord Bainistíochta Ghaelscoil Pheig Sayers, an tUasal Adrian Bhreathnach agus an tUasal Ciarán Dawson. Bhí sé de thuiscint agus de mhuinín acu dul i dteagmháil leis an gColáiste seo chun misneach a thabhairt dúinn tabhairt faoin bhforbairt seo.
Táimid an-bhuíoch freisin lenár mBord Bainistíochta féin agus le Bord Bainistíochta Bhord Oideachais agus Oiliúna Chorcaí as a dtacaíocht leis an dtogra seo. Murach treoir agus oilteacht ár bPríomhfheidhmeannach, an tUasal Ted Owens agus ár Stiúrthóir Scoile, an tUasal Pat McKelvey ní bheadh an fhorbairt seo indéanta.